Орто-Сай айылынын тургундары Иманалиев көчөсүн реконструкциялоо пландарына жана анын боюнда жайгашкан объектилердин бир бөлүгүнүн бузулушу мүмкүн экенине тынчсызданууда. Бул тууралуу Жогорку Кеңештин депутаты Дастан Бекешев жергиликтүү тургундар менен жолугушуудан кийин билдирди.

Анын айтымында, элде реконструкциялоо долбоору боюнча суроолор бар, аларга азырынча жооп бериле элек. Тактап айтканда, тургундар жолду оңдоо менен бир убакта канализация тартуу каралбаганын айтышууда.

Депутаттын пикиринде, мындай шартта кийин коммуникацияларды тартуу үчүн жаңы жолду кайра казууга туура келет.

«Анда: эгер кийин канализация тартуу үчүн аны кайра казууга туура келсе, жаңы жолду куруунун эмне кереги бар? — деген суроо жаралат», — деп белгиледи Бекешев.

Мындан тышкары, тургундар реконструкциялоонун бекитилген долбоору бар же жок экенин, жолдун туурасы канча болорун жана бузула турган тилкелердин чек аралары эмне себептен өзгөрүп жатканын билгилери келет.

Бекешевдин айтымында, айрым тургундардын үйлөрүнүн бир бөлүгү да бузулуп кетиши мүмкүн.

Депутат Бишкек мэриясына кайрылып, Иманалиев көчөсүн оңдоп-түзөө пландарын, ошондой эле канализация маселеси эмнеге жол куруу менен бир убакта чечилбей жаткандыгынын себептерин тактоону көздөп жатканын билдирди.

Бекешев буга чейин Бишкек шаарынын мэри мындай жумуштарды жүргүзүүнүн принциби катары: алгач коммуникациялар тартылып, андан кийин жолдор куруларын билдиргенин эске салды.