Кыргызстандын Мамлекеттик салык кызматы (МСК) жана Орусиянын Федералдык салык кызматы (ФСК) салыктык башкаруунун натыйжалуулугун жогорулатуу үчүн кайтарымсыз техникалык жардам көрсөтүү боюнча макулдашууга кол коюшту. Бул тууралуу МСКнын басма сөз кызматы билдирет.

Маалыматка ылайык, документке Бангкок шаарында өткөн Дүйнөлүк банк тобу менен Эл аралык валюта фондунун башкаруучуларынын жылдык жыйынынын алкагында МСК төрагасы Алмамбет Шыкмаматов жана Орусиянын ФСК жетекчисинин орун басары Юлия Шепелева кол коюшкан.

Макулдашууда салыктык башкаруу чөйрөсүндөгү кызматташтыкты мындан ары өнүктүрүү жана практикалык тажрыйба алмашуу каралгандыгы белгиленет.

Тараптар эки өлкөнүн салык кызматтары 2021-жылдан бери кызматташып келе жатканын белгилешти.

Юлия Шепелева кыргыз тарапка беш жылдык кызматташтык үчүн ыраазычылык билдирип, жаңы макулдашуу Кыргызстандын салык тутумунун ишинин натыйжалуулугун жогорулатууга мүмкүндүк берерине ишеним билдирди.

Иш-чаранын алкагында Алмамбет Шыкмаматов мамлекеттик кызматтарды жана салыктык башкарууну санариптик трансформациялоого, ошондой эле алардын инвестициялык климатка жана экономикалык өсүшкө тийгизген таасирине арналган панелдик талкууда сөз сүйлөдү.

МСК башчысы санариптештирүү жаңы технологияларды киргизүүгө гана эмес, жарандар жана бизнес үчүн мамлекеттик жол-жоболорду жөнөкөйлөтүүгө багытталышы керектигин баса белгиледи.

Анын айтымында, салыктык башкаруунун салттуу системасы ишкерлер маалымат берип, аны мамлекеттик органдар бир нече жолу кайра текшерген шартта иштейт.

Ошол эле учурда зарыл болгон маалыматтардын басымдуу бөлүгү кассалык операциялар, электрондук эсеп-фактуралар, бухгалтердик программалар жана бажы тутумдары аркылуу электрондук түрдө калыптанып калган.

«Мамлекет автоматтык түрдө ала турган нерсесин эмне үчүн кайра-кайра сурашы керек? Ишкер буга эмне үчүн убактысын коротушу керек? Ошондуктан биз салык кызматы маалыматтарды түздөн-түз экономикалык операциялардан алып, аларды автоматтык түрдө талдай турган моделге багыт алдык», — деди Шыкмаматов.

Ал санариптик өзгөртүүлөрдүн башкы максаты — кызматкерлердин туруктуу кол кийлигишүүсү жок эле мамлекеттик процесстер натыйжалуу иштей турган системаны түзүү экенин белгиледи.