«Ош» эл аралык аэропортунун жаңы аэровокзал комплексин 2026-жылдын аягына чейин, ал эми «Жалал-Абад» жаңы эл аралык аэропортун 2027-жылдын үчүнчү чейрегинде куруп бүтүрүү пландалууда. Мындай мөөнөттөрдү «Кыргызстан аэропорттору» ААК башкармалыгынын төрагасы Манасбек Самидинов Ош жана Жалал-Абад облустарына болгон иш сапарынын жыйынтыгында белгиледи.

Самидинов эки объекттин тең курулуш аянтчаларын жеке өзү көрүп, иштердин жүрүшүнө баа берди. Ал курулуштун сапатына коюлган талаптардын сакталышын текшерип, жооптуу адистердин жана подряддык уюмдардын өкүлдөрүнүн отчетторун укту. Өзгөчө көңүл иштердин графигине, материалдардын сапатына жана курулуштун долбоордук документтерге, техникалык талаптарга шайкеш келишине бурулду.

«Ош» аэропортунда аянты 25 миң чарчы метрден ашкан жаңы терминал курулууда. Самидиновдун айтымында, ал аэропорттун өткөрүү мүмкүнчүлүгүн кыйла жогорулатып, жүргүнчүлөр үчүн шарттарды жакшыртат жана ички, эл аралык каттамдарды кеңейтүүгө жол ачат.

Жалал-Абадда ишке ашырылып жаткан долбоордо аэровокзал комплексин, учуп-конуу тилкесин жана аба кемелерин коопсуз тейлөөгө керектүү объекттерди куруу каралган.

Самидинов бул долбоорлор жарандык авиацияны өнүктүрүү, аймактардын транспорттук жеткиликтүүлүгүн жогорулатуу жана өлкөнүн эл аралык авиациялык потенциалын бекемдөө үчүн стратегиялык мааниге ээ экенин белгиледи.

«Биздин алдыбызда так милдет турат — курулуштун жогорку сапатын камсыз кылуу жана белгиленген мөөнөттөрдү так сактоо. Биз жөн гана жаңы аэропортторду куруп жаткан жокпуз, өлкөбүздүн жарандарына ондогон жылдар бою кызмат кыла турган заманбап авиациялык инфраструктураны түзүп жатабыз», — деди ал.