Ош облусунун Кара-Суу районунда №101 мектептин 43 окуучусу белгисиз затка ууланды. Бул тууралуу Reporter.kg’ге Саламаттык сактоо министрлигинен билдиришти.

Маалыматка караганда, окуя 29-мартта болгон. Ош облустук балдар ооруканасына 43 бала кайрылып, алардын ичинен 18 бала ооруканага жаткырылган. Калганы амбулатордук дарылануудан өтүүдө.

Бүгүн, 30-мартта ооруканада беш окуучу калтырылып, калганы канааттандырарлык абалда амбулатордук дарыланууга чыгарылган.

Ооруканадагы окуучулардын абалы туруктуу.

Министрликтен учурда балдардын ууланганы боюнча экспертиза дайындалганын, анын жыйынтыгы менен алар эмнеге ууланганы белгилүү болорун кошумчалашты.

Биздин Телеграм каналга катталыңыз