Кыргызстандын президенти Садыр Жапаров 23-июлда Чолпон-Ата шаарында Беларустун тышкы иштер министри Максим Рыженковду кабыл алды. Бул тууралуу мамлекет башчысынын басма сөз кызматы билдирди.

Маалыматка караганда, тараптар эки тараптуу кызматташуунун актуалдуу маселелери жана бардык багыттар боюнча өз ара аракеттенүүнү кеңейтүү келечеги боюнча пикир алмашышты.

Мамлекет башчысы Кыргызстан менен Беларустун ортосунда өнөктөштүктү мындан ары бекемдөө үчүн зарыл болгон шарттар түзүлгөнүн белгиледи. Анын айтымында, буга саясий диалогдун жогорку деңгээли, бекем келишимдик-укуктук база жана тараптардын жетишилген макулдашууларды аткарууга берилгендиги өбөлгө түзөт.

Президент бул жолугушуу эки өлкө ортосундагы саясий диалогду мындан ары өнүктүрүүгө жана кызматташтыкты кеңейтүүгө өбөлгө түзөрүнө ишенимин билдирди.

Сүйлөшүүлөрдүн жүрүшүндө ошондой эле Беларустун президенти Александр Лукашенконун ШКУ саммитине жана VI Дүйнөлүк көчмөндөр оюндарынын ачылыш аземине катышуусунун маанилүүлүгү белгиленди.

Максим Рыженков Садыр Жапаровго Беларустун президенти Александр Лукашенконун саламын жана жакшы каалоо-тилектерин жеткирди. Ошондой эле ал Кыргызстандын 2027–2028-жылдарга БУУнун Коопсуздук Кеңешинин туруктуу эмес мүчөсү болуп шайланышы менен куттуктап, республика Кеңештин ишине олуттуу салым кошоруна ишеним билдирди.

Тараптар соода-экономикалык кызматташтыкты мындан ары өнүктүрүү жана биргелешкен долбоорлорду ишке ашыруу маселелерине өзгөчө көңүл бурушту.

Жолугушуунун жыйынтыгында Жапаров менен Рыженков мындан аркы тыгыз өз ара аракеттенүүгө жана жетишилген макулдашууларды ырааттуу ишке ашырууга даяр экендиктерин ырасташты.