Өзбекстандын президенти Шавкат Мирзиёев 30-июлда мамлекеттик сапар менен Кыргызстанга келди. Ал президент Садыр Жапаров менен сүйлөшүүлөрдү жүргүзөт жана аймактык саммитке катышат.

«Ысык-Көл» эл аралык аэропортунан жогорку даражалуу конокту Кыргызстандын президенти Садыр Жапаров тосуп алды.

Учактан түшкөндөн кийин Мирзиёевге меймандостуктун жана сый-урматтын белгиси катары кыргыздын салттуу даамы — боорсок менен бал сунушталды.

Аэропорттун аймагында Ардак кароол ротасынын аскер кызматкерлеринен турган ардактуу коридор тизилди. Президенттер өтүүчү жолдун боюнда кыргыздын улуттук аңчылык өнөрүнүн салттарын көрсөткөн «Салбурун» этнографиялык композициясынын катышуучулары — алгыр куштарын кармаган мүнүшкөрлөр жана тайгандар жайгашты.

«Шаттык» элдик үлгүлүү бий ансамблинин артисттери боз үйлөрдүн фонунда улуттук бийлерди аткарышты, ал эми соот кийген атчандар жана алп баатырлар кыргыз элинин тарыхый мурасына жана аскердик салттарына арналган театрлаштырылган композицияны тартуулашты.

Ч. Исабаев атындагы «Камбаркан» фольклордук-этнографиялык ансамбли кыргыз жана өзбек обондорун аткарды. Салтанатты ошондой эле кыргыз меймандостугуна, үй-бүлөлүк баалуулуктарга жана конок тосуу салттарына арналган театрлаштырылган оюн-зоок толуктады.

Мамлекеттик сапардын алкагында Мирзиёев Жапаров менен бетме-бет жана кеңейтилген курамда сүйлөшүүлөрдү жүргүзөт.

Мындан тышкары, ал Чолпон-Ата шаарында өтө турган Борбордук Азия мамлекеттеринин жана Азербайжандын башчыларынын бейформал Консультативдик жолугушуусуна катышат.