П.Ф. Шубин атындагы Борбордук балдар музыкалык мектебинде белгиленген квотадан (мамлекеттик буйрутмадан) тышкары башталгыч музыкалык билим берүү программалары боюнча контракттык окутуунун баасын жогорулатуу КР Маданият, маалымат жана жаштар саясаты министрлиги менен макулдашылган эмес. Бул маселе боюнча акыркы чечим азырынча кабыл алына элек, деп билдиришти Reporter.kg басылмасына ведомствонун басма сөз кызматынан социалдык тармактарда чыккан маалыматка түшүндүрмө берип.

Күн мурун П. Шубин атындагы музыкалык мектептин окуучуларынын ата-энелери окуунун баасы көтөрүлгөнүн билдиришкен.

«Эгер мурда ата-энелер айына 2500 сомдон, кийин 3500 сомдон төлөп келишсе, азыр бизди фактынын алдында калтырышты: арткы дата менен апрель жана андан кийинки айлар үчүн 6500 сомдон төлөөнү талап кылып жатышат. Биз мындай кескин баа көтөрүү кандай негизде болуп жатканын түшүнгүбүз келет. Бул мамлекеттик мектеп», — деп айтылат билдирүүдө.

Ата-энелер билим берүүнү жана мугалимдердин эмгегин колдоого каршы эместигин, бирок, алардын пикиринде, мындай чечимдер ачык-айкын жана мыйзамдуу кабыл алынышы керектигин баса белгилешүүдө.

Маданият министрлигинен билдиришкендей, контракттык окуунун баасын жогорулатуу маселеси КР Өкмөтүнүн 2009-жылдын 18-майындагы №300 «Кыргыз Республикасында акы төлөнүүчү билим берүү кызматтарына тарифтерди белгилөө жана колдонуу тартиби жөнүндө жобону бекитүү тууралуу» токтомунун, Министрлер кабинетинин 2024-жылдын 12-июнундагы №304 «Мамлекеттик органдардын жана алардын карамагындагы мекемелердин мамлекеттик кызмат көрсөтүүлөрүнүн бирдиктүү реестрин бекитүү жөнүндө» токтомунун, Министрлер кабинетинин 2026-жылдын 25-апрелиндеги №286 «КР билим берүү тутумунун уюмдарынын кызматкерлеринин эмгегине акы төлөө шарттары жөнүндө» токтомунун, ошондой эле башка ченемдик-укуктук актылардын алкагында каралат.

«Кароонун жыйынтыгы менен тиешелүү чечим кабыл алынат. Ал тууралуу маалымат кошумча берилет», — деп кошумчалашты ведомстводон.