Бир суткага дароо бир нече көрүнүктүү астрономиялык окуялар туш келди. Алсак, 12-августтан 13-августка караган түнү Персеида метеордук агымы эң жогорку чегине жетти, ал эми бир күн мурун бир катар өлкөлөрдүн жашоочулары күндүн толук тутулушуна күбө болушту. Мындан тышкары, август айындагы асманда бир эле учурда бир нече планетаны көрүүгө болот.

Персеида жылдыздар жамгырынын эң жогорку чеги

12-августтан 13үнө караган түнү жыл сайын болуучу эң белгилүү метеордук агымдардын бири — Персеиданын эң жогорку чегине туш келди. Анын булагы Свифт-Таттл кометасы калтырган бөлүкчөлөр болуп саналат. Жер бул тилке аркылуу өткөндө, бөлүкчөлөр атмосферага кирип, күйүп кетет да, асманда жарык издерди жаратат.

Ыңгайлуу шарттарда Персеиданын интенсивдүүлүгү саатына 100гө жакын метеорго жетиши мүмкүн. 2026-жылы айдын жарык болбогону байкоо жүргүзүүгө жакшы шарт түздү.

Кыргызстандыктар да жылдыздардын учушуна (жамгырына) байкоо жүргүзүү үчүн шаардын сыртына чыгышты. Социалдык тармактарда Персеиданын сүрөттөрү жана видеолору пайда болду.

Күндүн толук тутулушу

12-августтагы Күндүн толук тутулушу дагы бир ири астрономиялык окуя болду. Толук фазанын тилкеси Гренландия, Исландия жана Испания, ошондой эле башка бир катар аймактар аркылуу өттү. Айрым аймактарда толук фаза эки мүнөткө жакын созулду.

Посмотреть эту публикацию в Instagram

Публикация от Reporter.kg (@reporter_kg)

Толук фаза учурунда Ай Күндүн дискин толугу менен жаап калды, мунун аркасында байкоочулар күндүн таажысын көрө алышты.

Таңкы асмандагы планеталар

Август айында астрономияны сүйүүчүлөрдүн көңүлүн таңкы асмандагы бир нече планетанын жайгашуусу да бурду. Меркурий, Марс, Юпитер, Сатурн, Уран жана Нептунду асмандын бир бөлүгүнөн байкоого мүмкүн болду, бирок Уран менен Нептунду көрүү үчүн оптика (оптикалык шаймандар) талап кылынат.