Кыргызстанда быйыл дагы социалдык келишимдин катышуучуларын колдоо максатында пайызсыз насыя берүү программасы ишке ашырылат. Эмгек, социалдык камсыздоо жана миграция министрлиги билдиргендей, программа 2024-жылдан баштап иштеп баштаган.

Программанын алкагында мурда мамлекеттен каражат алып, өз ишин ийгиликтүү баштаган жарандар бизнести кеңейтүү үчүн 200 миң сомго чейин пайызсыз насыя ала алышат. Кредит үч жылдык мөөнөткө берилет. Катышуучуларга алгачкы 3 ай ичинде төлөмдөрдөн жеңилдик берилип, андан кийин негизги сумма тең бөлүп төлөнөт. Кредиттин пайыздарын мамлекет каржылайт.

Программага катышуу шарттары:

• социалдык контракттын катышуучусу болуу;
• ишкердик ишин жүргүзгөндүгүн ырастоочу документтин (жеке ишкер, патент же ЖЧК) болушу;
• кредиттик тарыхтын таза болушу;
• бекитилген бизнес-пландын болушу.

Кредит алуу үчүн «АБанк» жана «Элдик Банк» мекемелерине кайрылуу зарыл. Белгилей кетсек, бул программа аз камсыз болгон үй-бүлөлөрдүн ишкердик демилгелерин туруктуу өнүктүрүүгө багытталган.

Маалымат үчүн: социалдык келишим — бул аз камсыз болгон үй-бүлөлөр менен мамлекеттин ортосундагы келишим болуп саналат. Анын алкагында жеке ишкердикти баштоо же өнүктүрүү үчүн 150 миң сом өлчөмүндө кайтарымсыз каражат берилет. Программа 2022-жылдан тарта ишке ашырылып келет. Андан бери 48 миңден ашуун үй-бүлө менен келишим түзүлгөн.