Баткен облусунун Сүлүктү шаарындагы “Адахан” шахтасынын ичинде калып калган 4 адам куткарылды. Бул тууралуу Өзгөчө кырдаалдар министрлиги билдирди.

Маалыматка ылайык, кечээ, 23-ноябрда, куткаруу кызматына аталган шахтанын ичинде адамдар калып калганы тууралуу маалымат түшкөн.

ӨКМнын Тоо-кен кырсыгынан куткаруу кызматынын куткаруучулары барып, шахтанын 110 метр тереңинде калган 4 адамдын өмүрүн сактап калышкан.

“Куткаруучулар алгач жер алдында калган тургундарды дем алдыруу үчүн түтүк менен жер алдына аба жеткиришкен. Андан кийин уранды тазалап, кенчилерди чыгарууга жол ачып, түнкү саат 23:05те аман-эсен чыгарып алышкан”,- деп айтылат маалыматта.