Жогорку Кеңештин төрагасы Нурлан Шакиев сындан коркпой турганын билдирди. Бул тууралуу ал бүгүн, 5-октябрда парламентте журналисттердин кесиптик майрамына арналган иш-чарада билдирди.

Ал жакында эле гимнди өзгөртүү тууралуу маселе көтөргөндө, сынга кабылганын кыйытып, сындардан эч нерсе болбой турганын айтты.

“Кээ бирөө “Нурлан Шакиевди сындадым, моокумум канды” деп ырахат алышы мүмкүн. Мен ага эч нерсе болбойм. Жерден алып көргө, көрдөн алып жерге койсун, сындасын.. Ошол жазгандарга айтып коеюн: “сындай бергиле, мен эч нерсе болбойм”. Мен бир Кудайдын, өзүмдүн ар-намысымдын жана кыргыз элинин алдында ак кызматымды аткарсам болду. Мен 150 лайк менен 450 комментарийдин кулу болуп, андан коркпойм”, – деди ал.