Эми такси айдоочулары жана мындай кызматтарды көрсөткөң ишканалар лицензия алуу үчүн арыздарды онлайн тапшыра алышат. Бул тууралуу Ички иштер министрлиги билдирди.

Санариптик кызматтар «МБанк», «Элдик» жана «Түндүк» мобилдик тиркемелери аркылуу жеткиликтүү. Колдонуучулар тиркемеден идентификациядан өтүп, документтерин жүктөп, электрондук арыз толтурушу керек. Лицензия берилген соң, анын маалыматтары санариптик форматта тиркемеде көрүнүп турат.

Эске салсак, такси айдоочулары үчүн лицензия алуу мөөнөтү ушул жылдын 1-июлунда аяктайт. ИИМ аталган мөөнөттөн кийин лицензиясыз иштегендерге айып пул салынарын эскертти. Анын көлөмү:

• жеке жактар үчүн — 7 миң 500 сом;
• юридикалык жактар үчүн — 23 миң сом.

Министрлик жүргүнчү ташуучуларды мыйзам талаптарын аткарууга жана лицензияны өз убагында тариздөөгө чакырды.