Талас облусунда 14 жаштагы өспүрүм үйүндө асынган абалда табылган. Бул тууралуу облустук милициядан билдиришти.
Маалыматка караганда, 19-декабрда милицияга Бакай-Ата районунун Кыргызстан айылында, 17-декабрда, 14 жаштагы А. С. аттуу өспүрүм үйүндө каза болгондугу жөнүндө билдирүү түшкөн.
Аталган билдирүү маалыматтардын электрондук журналына катталып, Бакай-Ата райондук милициясынын жетекчилиги жана тергөө-ыкчам тобу жеринен барып текшерүү жүргүзгөн.
«Бакай-Ата районунун Оро айыл өкмөтүнө караштуу Кыргызстан айылында өспүрүм өз үйүнүн артында асынып каза болгондугу аныкталган. Анын жансыз денеси 18-декабрда жерге берилгендиги такталган. Бул окуя боюнча жакындары эч кимге арыз-дооматы жоктугун билдирген», — деп айтылат маалыматта.
Учурда текшерүү иштери жүрүп жатат.
Биздин Телеграм каналга катталыңыз
