31-август күнү Барпы айылында УКМК төрагасы Камчыбек Ташиевге 9 балалуу үй-бүлө кайрылып, жашоого турак жайлары жок экенин билдиришкен. Аял Ташиевге: «Оштон келдик. Үч күндөн бери артыңыздан жүрөбүз», — деп айткан.

Төрага үй-бүлө башчысынын ден соолугу чың туруп, жардам сураганына нааразы болгон. Бирок соңунда аларга жер тилке бөлүп берүүнү жана үй курууну караштыруу тапшырмасын берген.

Кара-Суу районунун акими Канат Табалдиев бул үй-бүлө тууралуу маалымат берип, төмөнкүлөрдү айтты:

• 2023-жылы үй-бүлөгө Кызыл-Кыштак айыл өкмөтүнөн бекер жер бөлүнгөн.
• Жергиликтүүлөр менен демөөрчүлөр алардын атына эки бөлмөлүү үй куруп беришкен.
• Бирок 2024-жылы үй-бүлө ал үйүн сатып жиберип, Отуз-Адыр айыл өкмөтүндөгү жайыт жерге үй салып көчүп барышкан.
• Азыр аларга ошол айылдан дагы жер берүү маселеси каралып жатат.