Үстүбүздөгү жылдын тогуз айынын ичинде 711 этникалык кыргыз кайрылман макамына ээ болду. Бул тууралуу Эмгек, социалдык камсыздоо жана миграция министрлиги билдирди.

Маалыматка ылайык, кайрылман макамын төмөнкү өлкөлөрдөн келген этникалык кыргыздар алган:

• Өзбекстандан— 54 адам;
• Тажикстандан— 629 адам;
• Кытайдан— 12 адам;
• Орусиядан— 7 адам;
• Ооганстандан— 8 адам;
• башка өлкөлөрдөн — 1 адам.

Кайрылман күбөлүгү үч жылдык мөөнөткө берилет. Ушул убакыт аралыгында кайрылман макамынын ээлери Кыргызстандын жарандыгын алуу боюнча кайрылууга тийиш.

Кайрылман макамына ээ болгон жарандар социалдык жөлөкпулдарга, пенсияларга, медициналык жардамга, билим алууга жана Кыргызстандын аймагында эмгектенүүгө укуктуу.

Мекеме билдиргендей, эгемендүүлүк алгандан бери Кыргызстанга 70 миңден ашуун этникалык кыргыздар көчүп келип, алардын ичинен 65 миңге жакыны өлкө жарандыгын алышкан.