Казакстандын президенти Касым-Жомарт Токаев менен Түркмөнстандын президенти Сердар Бердымухамедов «Борбордук Азия мамлекеттеринин башчыларынын жана Азербайжандын президентинин бейформал консультативдик жолугушуусуна» катышуу үчүн Кыргызстанга келишти. Жолугушуу Ысык-Көл облусунун Чолпон-Ата шаарында өтөт.

«Ысык-Көл» эл аралык аэропортунда жогорку даражалуу меймандарды Кыргыз Республикасынын министрлер кабинетинин төрагасы – президенттин администрациясынын жетекчиси Адылбек Касымалиев тосуп алды.

Жолугушууда Борбордук Азия өлкөлөрүнүн жана Азербайжандын лидерлери аймактык кызматташтыкты, ошондой эле соода-экономикалык, транспорттук-логистикалык, энергетикалык жана өз ара кызыкчылык жараткан башка багыттардагы кызматташууну талкуулашат.