Токтогул суу сактагычындагы суунун көлөмү көбөйүүсүн улантууда, ал эми былтыркы деңгээлден артта калуу дээрлик эки эсеге кыскарды, деп билдирди бүгүн радиоэфирде КР энергетика министри Алтынбек Рысбеков.

Анын айтымында, бүгүнкү күнгө карата Токтогул суу сактагычындагы суунун көлөмү 10,7 миллиард куб метрди түзүп, 11 миллиарддык чекке жакындап калды.

Рысбеков белгилегендей, апрель-май айларында былтыркы деңгээлден артта калуу 1,5 миллиард куб метрге жакынды түзгөн болсо, азыр айырма 700-800 миллион куб метрге чейин кыскарды.

Ал түшүндүргөндөй, суунун корунун көбөйүшүнө жаан-чачындар жана кардын эрип жатышы шарт түзүүдө.

«Азыр жамгыр жаап, кардын эриши уланууда. Суунун агып келиши көбөйөт деп үмүттөнүп жатабыз жана бул учурдагы көйгөйлөрдү жарым-жартылай чечүүгө мүмкүндүк берет», — деди министр.

Анын айтымында, күз-кыш мезгилинен туруктуу өтүү үчүн Токтогул суу сактагычында 11,5-12 миллиард куб метрден кем эмес суу топтоо зарыл.

Министр кошумчалагандай, мекеме энергосистеманын ишин пландоодо суунун агып келүү көлөмүн эске алып, аны үнөмдүү пайдалануу боюнча чараларды көрүүдө.