Орусиянын Мамлекеттик Думасы 7-июлдагы жыйынында ички иштер жана миграция маселелери боюнча компетенттүү органдардын өкүлчүлүктөрүнүн укуктук макамы жөнүндө Кыргызстан менен макулдашууну ратификациялады.

Эскерте кетсек, өкүлчүлүктөрдүн укуктук макамын, алардын ишмердүүлүгүнүн тартибин, ошондой эле кызматкерлердин укуктарын, милдеттерин жана кепилдиктерин аныктаган документке 2025-жылдын 26-ноябрында Бишкекте кол коюлган.

Макулдашууга ылайык, Кыргызстан Орусиянын аймагында КР ИИМдин жана КР Эмгек, социалдык камсыздоо жана миграция министрлигинин өкүлчүлүгүн ачат. Экөө тең Москвада жайгашат.

Орусия тарап өз кезегинде Бишкектеги Орусиянын ИИМ өкүлчүлүгүнүн укуктук макамын бекитет.

Түшүндүрмө катта белгиленгендей, макулдашуунун негизги максаты — кылмыштуулукка, баңгизаттардын мыйзамсыз жүгүртүлүшүнө жана мыйзамсыз миграцияга каршы күрөшүүдө кызматташууну өнүктүрүү, ошондой эле эки өлкөнүн компетенттүү органдарынын өз ара аракеттенүүсүнүн натыйжалуулугун жогорулатуу.

Мыйзам долбоорун кароодо сөз сүйлөп жатып, Мамдуманын миграция жана жарандык маселелери боюнча атайын өкүлү Константин Затулин бул документ Орусия менен Кыргызстандын ортосундагы калыптанып калган кызматташтык тажрыйбасын бекемдей турганын жана өкүлчүлүктөрдүн мындан аркы иши үчүн укуктук негиз түзөрүн билдирди.

Мындан тышкары, макулдашуу өкүлчүлүктөрдүн кызматкерлерине жана алардын үй-бүлө мүчөлөрүнө эл аралык укукка ылайык дипломатиялык артыкчылыктарды жана кол тийбестиктерди берүүнү карайт.

Ушундай эле макам өкүлчүлүктөрдүн имараттарына (жайларына), алардын мүлкүнө, архивдерине жана расмий документтерине да жайылтылат.