УКМК Бишкектин соода борборлорунда сатуу максатында Кыргызстанга уюлдук телефондорду мыйзамсыз алып келүүнү уюштурган трансулуттук топтун ишине бөгөт коюлганын билдирди.

Атайын кызматтын маалыматы боюнча, тергөө-ыкчам иш-чараларынын жүрүшүндө өлкөгө бажы жана салык төлөмдөрү төлөнбөстөн, ошондой эле милдеттүү мамлекеттик каттоодон өткөрүлбөстөн алынып келинген смартфондордун ири партиясы мыйзамсыз жүгүртүүдөн алынды.

Иш боюнча схеманын уюштуруучуларынын бири деп шектелген чет өлкөлүк жаран жана Мамлекеттик салык кызматынын кызматкери кармалды. Тергөөнүн версиясы боюнча, салыкчы акчалай сыйлык үчүн Бишкекте аткезчилик техникаларды сатууга көмөктөшүп келген.

Учурда УКМК уюлдук телефондорду мыйзамсыз жеткирүү каналын уюштурууга катыштыгы болушу мүмкүн болгон башка адамдарды аныктоодо.