Улуу Британияда Кембридждин жанында 9-майда «Өлбөс полк» акциясы өтөт. Ал Жеңиш күнүнө карата фестиваль менен айкалыштырылат деп ЖМКлар кабарлоодо. Иш-чаранын уюштуруучулары — Вадим Алексин жана Антон Найденов.

Иш-чара Лондондун батыш тарабынан башталган автожүрүш менен башталат. Колонна Кембриджге багыт алып, ал жерде Жеңиш күнүнө арналган жандуу музыка коштолгон фестиваль өткөрүлөт. Фестиваль «Өлбөс полк» акциясы менен чогуу өтөт.

«Ал жерде сахна, жандуу музыка, балдар үчүн оюн-зоок аянтчасы, чатыр тигип түнөп калуучу жай жана курал-жарактардын (зыянсыздандырылган) көргөзмөсү болот. Аскердик форма кийген жана “Өлбөс полктун” кийимдерин кийген адамдар келишет… Сахнанын жанына эскерүү дубалы орнотулат. Негизги максат — ата-бабаларыбыз биз менен бирге ушул концертте жүргөндөй сезилсин», — деп белгиледи Алексин.

Уюштуруучулар иш-чарага 2 миңге чейин адам келерин күтүшүүдө. Лондондон акция өтүүчү жерге эки колонна жөнөйт. Жалпысынан Кембриджге Британиянын 17 аймагынан колонналар барат. Фестиваль акыркы бир нече жылдан бери биринчи жолу өткөрүлгөнү жатат.

Британиянын бийлиги тарабынан иш-чараны уюштурууда эч кандай тоскоолдуктар болгону тууралуу азырынча кабарлана элек.

«Өлбөс полк» — Улуу Ата Мекендик согуштун катышуучуларынын жана курман болгондордун элесин түбөлүккө сактоо үчүн Кыргызстанда, Россияда жана бир катар жакынкы жана алыскы чет өлкөлөрдө өткөрүлүүчү жалпы элдик акция.

Белгилей кетсек, буга чейин Вашингтондо да «Өлбөс полк» акциясы өткөн.

«Жеңиш күнүнө карата өткөрүлгөн бул акция Экинчи дүйнөлүк согуштун курмандыктарына — бир гана Советтер Союзу эмес, АКШ тараптан да таазим кылууга мүмкүнчүлүк берет. Ал эми жүрүшкө каршы чыккандар өз ата-бабаларынын элесине көө жапкан болот», — деп билдирген жүрүшкө катышкан америкалык Кайла Пальфенчен ЖМКларга.

Ишемби күнү Вашингтондогу «Өлбөс полкко» жүзгө жакын адам, анын ичинде улгайган мекендештер, балалуу ата-энелер жана чет элдиктер катышкан.

«Мен америкалыкмын. Мен ушул жерде төрөлүп-өскөм… жана ошол кезде америкалыктар Советтер Союзундагы бир туугандары менен ийин тирешип согушуп, кандай курмандыктарга барганын жакшы түшүнөбүз. Алар курал кармап бирге курман болушкан. Алар согушта бирге жыгылышкан», — деп кошумчалады Пальфенчен.

Ал Жеңиш күнү америкалыктар үчүн да маанилүү экенин, анткени согуш курмандыктарына таазим кылууга шарт түзөрүн баса белгиледи.

«Бул майрамга каршылык көрсөтүлүп жатканын көрүү бизге оор… Сөз фашизмге каршы согуш — америкалыктар совет эли сыяктуу эле өз өмүрүн курмандыкка чалган согуш жөнүндө болуп жатат… Демек, алар өз ата-бабаларынын элесин сыйлабагандыгын көрсөтүп жатышат», — деди Пальфенчен.

Ошондой эле ал Вашингтонго Нью-Йорктон келгенин жана Бруклинде да «Өлбөс полк» акциясы пландалып жатканын кошумчалады.