Ысык-Көлдөгү тоо чокуларынын бирине “Бириккен Улуттар Уюмунун чокусу” деп атоо сунушталууда. Министрлер кабинети иштеп чыккан тиешелүү мыйзам долбоору Жогорек Кеңешке келип түштү.

Аталган чоку Ак-Суу районунун Кыдыр Аке айыл аймагында, Тянь-Шандын Сары-Жаз тоо кыркасынын Түштүк Эңилчек мөңгүсүнүн аймагында жайгашкан (географиялык координаттары: B=42°13’56” L=79°47’37”). Анын бийиктиги 5576 метрди түзөт.

Бул мыйзам долбоору президенттин жарлыгынын негизинде жана Кыргызстан менен БУУнун өз ара алакасын арттыруу үчүн иштелип чыккан.

Документте айтылгандай, Кыргызстан БУУга 1992-жылы 2-мартта кирген. БУУ эл аралык абройлуу уюм болуп саналат. Кыргызстанга ар тараптуу колдоо көрсөтүп келет.