Жалал-Абад облусунун Аксы районундагы Кербен шаарын айланып өтүүчү унаа жолу курулууда. Жолдун жалпы узундугу 9 чакырымды түзөт. Бул тууралуу Транспорт жана коммуникациялар министрлиги билдирди.

Маалыматка ылайык, жолго эки катмар асфальт төшөлөт. Азыркы учурда биринчи катмардын 6 чакырымы бүткөрүлдү. Курулушка 8 атайын техника жана 20га жакын жумушчу тартылган. Жаңы жол буга чейин айдоо талаасы болгон тилке аркылуу түшүрүлүүдө.

Министрлик жаңы жол пайдаланууга берилгенден кийин Ала-Бука жана Чаткал райондоруна баруучу оор жүк ташуучу автоунаалар Кербендин ичине кирбестен, айланып өтөрүн билдирди. Бул шаардагы унаа тыгындарын азайтып, коопсуздукту камсыз кылууга жана жүк ташуу убактысын кыскартууга шарт түзөт.