Президент Садыр Жапаров  Казакстандагы кырдаал боюнча ЖККУга мүчө өлкөлөрдүн лидерлери менен сүйлөштү. Бул туурасында өлкө башчынын басма сөз кызматы билдирди.

Маалыматка караганда, Садыр Жапаров Казакстандын президенти Касым-Жомарт Токаев жана башка ЖККУга мүчө өлкөлөрдүн лидерлери менен Казакстандагы кырдаалды талкуулаган. Уюмдун төрагасы Никол Пашинян менен да баарлашкан. Президент Садыр Жапаров коңшу өлкөдөн адам курмандыктары, көп сандаган талап-тоноочулук жана зомбулук фактылары жана башка зордук-зомбулук тууралуу маалыматтарга тынчсыздануусун билдирди.

Тараптар ЖККУнун кризистик кырдаалдарга каршы аракеттенүү боюнча уставына ылайык коопсуздукту камсыздоо боюнча бирдиктүү позицияны талкуулашты.