Министрлер кабинетинин төрагасы Акылбек Жапаров Баткен, Согди жана Фергана облустарынын губернаторлорунун кезектеги облустук жыйынынын алкагында Тажикстандын Согди облусунун төрагасы Раджабба Ахмадзода жана Фергана облусунун акими Хайрулло Бозаров менен жолугушту. Бул тууралуу Министрлер кабинетинин маалымат кызматы билдирди.
Жолугушууда министрлер кабинетинин башчысы кыргыз тараптын кыргыз-тажик жана кыргыз-өзбек мамилелеринин бардык спектри боюнча ачык жана мазмундуу сүйлөшүүгө даярдыгын айтты. Кыргызстан чектеш бир тууган мамлекеттер – Тажикстан жана Өзбекстан менен достук, жакшы коңшулук жана өз ара түшүнүшүү маанайында кызматташууну өнүктүрүүгө өзгөчө маани берери белгиленди.
«Аймактар аралык тыгыз кызматташуу, эки тараптуу жана көп тараптуу форматта аймактардын активдүү байланыштарын колдоо чек ара аймактарында тынчтыкты жана туруктуулукту чыңдоого өбөлгө түзөт. Бул контекстте биздин өлкөлөр ортосундагы мамлекеттик чек ара тилкелерин делимитациялоо жана демаркациялоо процессин өз ара ишеним духунда мүмкүн болушунча тез арада аяктоо маанилүү. Өлкөлөрүбүздүн ортосундагы чек ара маселелерин биротоло чечүү бир туугандык мамилелерди мындан ары да чыңдоого, Борбор Азия аймагында туруктуулукту жана коопсуздукту чыңдоого өбөлгө болоруна терең ишенем», — деп белгиледи Акылбек Жапаров.
Министрлер кабинетинин башчысы кыргыз, тажик жана өзбек элдеринин салттуу жана көп кылымдык достугунун негизинде биздин өлкөлөр ортосундагы кызматташтык мындан ары да прогрессивдүү жана жемиштүү өнүгө берерине ишеним билдирди.
Биздин Телеграм каналга катталыңыз
