Министрлер кабинети «Референдум жөнүндө» жаңы конституциялык мыйзам долбоорун иштеп чыкты. Бийлик референдум өткөрүү эрежелерин жаңылап, аларды 2021-жылы кабыл алынган Конституцияга шайкеш келтирүүнү сунуштоодо.

Мыйзам долбоорунун маалымкат-негиздемесинде айтылгандай, азыркы мыйзам 2016-жылы — Конституция өзгөргөнгө чейин кабыл алынган. Ушундан улам айрым нормалар азыркы мамлекеттик башкаруу системасына жана колдонулуп жаткан жол-жоболорго туура келбей калган.

Мыйзам долбоору менен президенттин, парламенттин жана Борбордук шайлоо комиссиясынын референдумду дайындоо жана өткөрүүдөгү ыйгарым укуктарын тактоо сунушталууда. Ошондой эле добуш берүүнү уюштуруу жана жыйынтыгын чыгаруу тартибин жаңылоо пландалууда.

Мындан тышкары, бийлик референдум өткөрүү эрежелерин президенттик жана парламенттик шайлоолордо колдонулуп жаткан стандарттарга ылайыкташтырууну көздөөдө. Анда жарандарды идентификациялоо, бюллетендер, аралыктан добуш берүү жана башка процедуралар тууралуу сөз болууда.

Маалымкат-негиздемеде өзгөртүүлөр мыйзамдардагы карама-каршылыктарды жоюу, референдумдардын ачыктыгын жогорулатуу жана жарандардын мамлекеттик чечимдерди кабыл алууга катышуусун күчөтүү үчүн керек экени белгиленген.

Мыйзам кабыл алынгандан кийин бийлик референдум өткөрүүнүн бирдиктүү жана түшүнүктүү эрежелерин түзүп, добуш берүү жол-жобосуна болгон ишенимди жогорулатууга үмүт артып жатат.