Жогорку Кеңештин депутаты Камила Талиева парламенттин жыйынында мектеп окуу китептерине байланыштуу кырдаалды текшерүү үчүн депутаттык комиссия түзүүнү сунуштады.

Анын айтымында, социалдык тармактарда ата-энелердин жаңы окуу китептеринин салмагына, боёктун кескин жытына, басманын сапатына жана китептердин мазмунуна нааразы болгон кайрылуулары байма-бай жарыяланып жатат. Талиева биринчи класстын окуучуларынын ата-энелеринин акыркы видео кайрылууларынын бирин кесиптештерине жөнөтөрүн билдирди.

Парламентарий ошондой эле окуу китептерин даярдоо менен алектенген «Окуу китеби» мамлекеттик мекемесинин ишин сынга алды. Ал эки жылдан бери мекеменин ишмердүүлүгүнө байкоо жүргүзүп келе жатканын жана олуттуу көйгөйлөр бар экенин айтты. Тактап айтканда, Талиева коррупциялык схемалар болушу мүмкүн экенин айтып, укук коргоо органдарына текшерүү жүргүзүүнү тапшырууну сунуштады.

Буга чейин «Окуу китеби» Талиеванын сынына жооп берген. Мекемеден окуу китебин даярдоо бир нече этаптан турарын жана ага авторлор, предметтик адистер, методисттер, редакторлор, корректорлор, дизайнерлер жана эксперттер катышарын билдиришкен.

«Алар Талиеванын айткандары негизсиз деп жазып жатышат. Анда анын негизсиз экенин далилдеш үчүн депутаттык комиссия түзүп, иликтөө жүргүзөлү», — деп сунуштады эл өкүлү.

Талиева мектептерде окуу китептеринин жетишсиздигине да токтолду. Анын айтымында, ата-энелерге жана мугалимдерге китептердин электрондук версияларын телефондон окуу сунушталууда, ошол эле учурда мектептерде смартфондорду колдонууга чектөө киргизилген.

Депутат ошондой эле окуу китептери менен камсыздоодогу көйгөйлөр үчүн жоопкерчиликти мугалимдерге жүктөөгө болбой турганын айтып, педагогдорду коргоого чакырды.

Талиева мектеп адабияттарын чыгарууга бөлүнгөн каражаттарды да эске салып, акчанын натыйжалуу пайдаланылышын жана мектептердин сапаттуу китептер менен камсыз болушун көзөмөлдөөнү күчөтүүгө чакырды.

Жогорку Кеңештин төрагасы Марлен Маматалиев мындай комиссия түзүлөрүн билдирди.