Чүй облусундагы айланма жолдон 143 жолу жол эрежесин бузуп, айыппулду төлөбөй жүргөн айдоочу кармалды. Бул тууралуу облустун Жол кыймылынын коопсуздугун камсыздоо башкармалыгынан билдиришти.

Маалым болгондой, 9-мартта рейд маалында айланма жолдон чет элдик номер тагылган “Хюндай Солярис” унаасы токтотулган. Текшерүү учурунда, унаанын ээси 143 жолу жол эреже бузганы “Коопсуз шаардын” камераларына түшүп калганы, ал айыппулдарды төлөбөй жүргөнү аныкталган. Ага байланыштуу айдоочуга тиешелүү протокол түзүлүп, унаасы айып короого коюлган.

Аталган башкармалык белгилегендей, эми айдоочу айыппулдарды толук төлөмөйүнчө, унаасы айып короо жайынан чыгарылбайт.