Кыргызстандын Министрлер кабинетинин төрагасы Адылбек Касымалиев Минск шаарында өткөн «Иннопром. Беларусь 2026» эл аралык өнөр жай көргөзмөсүнө катышты. Бул тууралуу Минкабдын басма сөз кызматы билдирди.

Көргөзмөнүн аянтында Кыргызстандын улуттук күркөсү уюштурулуп, өлкөнүн өнөр жай тармагындагы 12 компаниясы өз продукцияларын койгон. Жалпы көргөзмөгө 14 миңден ашык адам катышкан.

Андан соң Адылбек Касымалиев «Өндүрүштүк-технологиялык кызматташтык: бири бирин толуктоочу өнөктөштүк» темасындагы пленардык сессияда сөз сүйлөгөн. Ал ЕАЭБ алкагында биргелешкен өндүрүштү өнүктүрүүгө токтолуп, «Кытай–Кыргызстан–Өзбекстан» темир жолу жана «Камбар-Ата-1» ГЭСи сыяктуу долбоорлор техникага жана электр жабдууларына суроо-талап жаратарын, алардын бөлүгүн Биримдикке мүчө мамлекеттерден алуу керектигин айткан.

Минкаб төрагасы Кыргызстан менен Беларустун кызматташтыгынын мисалы катары Бишкекте көмөкчордондорду чыгаруучу биргелешкен заводдун ачылышын белгилеген. Ал кызматташтыктын багыттары катары машина куроо, электр жабдуулары, курулуш материалдары, фармацевтика жана жеңил өнөр жай тармактарын көрсөткөн.

Жыйында ошондой эле Беларусь, Казакстан, Өзбекстан, Орусия жана Никарагуа өкүлдөрү сөз сүйлөшүп, өнөр жай тармагындагы кызматташуу мүмкүнчүлүктөрү тууралуу айтып беришкен. Алар бул аянтча ишкердик байланыштарды кеңейтүүгө жана ЕАЭБге мүчө мамлекеттердин ортосундагы кызматташтыкты тереңдетүүгө багытталганын белгилешкен.