Баткен шаарында алдамчылыкка жана мыйзамсыз лотерея уюштурууга шектелип 27 жаштагы К.А. аттуу жаран кармалды. Бул тууралуу облустук милициядан билдиришти.

Милицияга арыз менен бир нече жаран кайрылып, шектүү 2026-жылдын июнь айында алардын ишенимине кирип, Lexus, Hyundai Porter жана башка автоунааларын алып, акчасын бербей жүргөнүн билдиришкен.

Мындан тышкары, кармалган жаран YouTube платформасындагы «Апаз-ТВ» каналы аркылуу лотерея уюштуруп келген. Тергөө иштеринин жүрүшүндө лотереянын мыйзамсыз экендиги аныкталып, жабырлануучуларга келтирилген материалдык зыян 2 миллион сомдон ашканы такталган.

Бул фактылар боюнча Кылмыш-жаза кодексинин «Алдамчылык» беренеси менен кылмыш иши козголгон. Шектүү убактылуу кармоочу жайга киргизилди.

Баткен ОИИБ аталган жарандын аракеттеринен же «Апаз-ТВ» каналындагы лотереядан жабыркаган жарандарды милицияга кайрылууга чакырды.