Жогорку Кеңештин депутаты Дастан Бекешев Бишкек мэриясынын борбор калаадагы балкондорду жана кошумча курулуштарды демонтаждоо аракеттерин сынга алды. Бул иштер Шанхай кызматташтык уюмунун саммитине жана Дүйнөлүк көчмөндөр оюндарына даярдыктын алкагында жүргүзүлүүдө.

Парламент жыйынында сүйлөгөн депутат шаарды көрктөндүрүү зарыл экенин белгилеп, бирок бийлик тротуарлардын абалына жана борбор калааны жашылдандырууга көбүрөөк көңүл бурушу керектигин айтты.

Анын айтымында, Манас проспектиси менен Абдрахманов көчөсүндөгү үйлөрдүн жашоочулары мэриянын имараттардын фасаддарын баштапкы көрүнүшүнө келтирүү аракетине нааразы. Анткени бул иштердин алкагында тургундар өз каражатына жылуулап, айнектетип алган балкондор бузулуп жатат.

Бекешев бул маселеге шаардык дизайн боюнча адистерди тартуу аркылуу кыйла маданияттуу мамиле жасоого болмок деп эсептейт.

«Мен ШКУнун саммитинин алдында шаарды көрктөндүрүү каалоосу бар экенин түшүнөм. Бирок муну мэрияга карата мынчалык көп даттануулар болбогондой, кыйла цивилизациялуу жол менен жасоо керек», — деди депутат.

Ошондой эле ал шаардагы жашыл бак-дарактарды кыюуга нааразы болуп, Бишкекти көбүрөөк жашылдандырууга чакырды. Анын айтымында, борбор калаа дагы эле өтө ысык жана чаңдуу бойдон калууда.

Мындан тышкары, эл өкүлү Президенттин администрациясын бул кырдаалды көзөмөлгө алууга чакырып, жеке менчикти коргоого байланыштуу Конституциянын нормаларын сактоонун маанилүүлүгүн эске салды.