Бишкек шаарынын мэри Айбек Жунушалиев борбор калааны ири эл аралык иш-чараларга даярдоонун алкагында бюджеттик каражат бөлүнгөн ар бир объект боюнча чыгымдарды аудиттөө жана анализдөө тапшырмасын берди. Бул тууралуу мэриядан билдиришти.

Кеңешмеде Шанхай кызматташтык уюмунун саммитине, VI Дүйнөлүк көчмөндөр оюндарына жана Кыргызстандын көз карандысыздыгынын 35 жылдыгына арналган иш-чараларга даярдыктын жыйынтыктары чыгарылды.

Муниципалитеттин маалыматы боюнча, даярдыктын алкагында коюлган негизги талаптар жана милдеттер аткарылды. Ошол эле учурда Жунушалиев жолдорду жана тротуарларды оңдоо, имараттардын фасаддарын жаңылоо, жашылдандыруу, жарыктандыруу жана шаардык инфраструктураны өнүктүрүү боюнча башка иштер улантылышы керектигин белгиледи.

Мэр бюджеттик каражаттардын колдонулушун көзөмөлдөөгө өзгөчө көңүл бурду. Ал жолдорду жана жол инфраструктурасын оңдоого, фасаддарды жаңылоого жана башка иштерге бөлүнгөн акчанын максаттуу колдонулушун текшерүү үчүн ар бир объект боюнча чыгымдарга аудит жана анализ жүргүзүүнү тапшырды.

Мэриядан белгилешкендей, ар бир объект жана аткарылган иштер негизделиши жана мыйзам талаптарына ылайык келиши керек, ал эми чыгымдар — иш жүзүндө аткарылган иштин көлөмүнө төп келиши шарт. Аткарылган иштердин актыларын тыкыр текшерүү тапшырылды.

Кеңешменин жыйынтыгында шаардык кызматтарга жана райондук администрацияларга башталган ишти улантуу жана анын сапатын, аткаруу мөөнөттөрүн жана каражаттардын максаттуу колдонулушун көзөмөлдөө тапшырылды.