Бишкектеги Ахунбаев жана Тыналиев көчөлөрүнүн кесилишинде жеке тез жардам кызматынын унаасы менен Subaru Outback кагылышты. Бул тууралуу Милициянын кайгуул кызмат башкармалыгы билдирди.

Алдын ала маалыматтар боюнча, тез жардам унаасы Ахунбаев көчөсү менен чыгыштан батышты көздөй, ал эми Subaru Outback түндүктөн түштүккө карай бара жаткан. Тез жардам унаасынын айдоочусунун айтымында, Subaru светофордун тыюу салынган белгисинен өтүп кеткен.

Жол кырсыгынын кесепетинен тез жардам унаасы медициналык мекемеге алып бара жаткан бейтап жабыркады. Аны башка тез жардам бригадасы ооруканага жеткирди.

Каза болгондор жок. Учурда кырсыктын бардык жагдайлары жана себептери такталууда.