Бишкек шаарынын Көк-Жар айылында салынып жаткан 750 орундуу жаңы мектеп 12-сентябрда пайдаланууга берилет. Окуу жайдын курулушу үстүбүздөгү жылдын февраль айында башталган. Бул тууралуу Курулуш, архитектура жана турак жай-коммуналдык чарба министрлиги билдирди.

Имарат үч кабаттан турат жана анын жалпы аянты 3348,9 чарчы метрди түзөт. Мектептин ичинде окуу класстары, лабораториялар, китепкана, ашкана, компьютердик класстар, жыйындар залы, эмгек кабинеттери жана спорт залы жайгашкан.

Министрлик учурда Бишкек шаары боюнча республикалык бюджеттин эсебинен дагы 19 мектептин курулушу жүрүп жатканын билдирди. Курулуштар борбор калаадагы мектептерде орун тартыштыгын жоюу жана билим берүүгө шарт түзүү максатында ишке ашырылып жатканы айтылды.