Кыргыз-тажик чек арасындагы ок атышуудан улам Кыргызстандын эки чек арачысы жарадар болду. Бул тууралуу Саламаттыкты сактоо министрлигинин басма сөз кызматы билдирди.

Маалыматка караганда, тез жардам кызматы жабыркаган эки аскер кызматкерин Баткен облустук ооруканасына жеткирүүдө.

“Жабыркаган эки чек арачынын бири оор абалда. Экинчи чек арачынын абалы орто оор деп бааланууда. Окуя болгон жерде тез жардам кызматы иш алып барууда. Ооруканада бардык кызматкерлер күчөтүлгөн тартипте иштөөгө өтүштү”, – деп айтылат маалыматта.

Буга чейин Мамлекеттик чек ара кызматы чек арадагы ок атышуу токтогонун жана бир аскер кызматкери жарадар болгонун билдирген.