15-октябрда Чүй облусунун Аламүдүн районунда жылына 3 миң тоннага чейин даяр продукция чыгарууга жөндөмдүү балыкты кайра иштетүүчү завод ачылды. Ишкана «Салих Аква» балык өстүрүү кластеринин курамына кирет. Бул тууралуу Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирди.

Заводдо форель, осетр жана балыктын башка түрлөрү терең иштетилип, даяр продукция чыгарылат. Ишкана чийки затты кластерге кирген чарбалардан гана эмес, өлкөдөгү башка балык өстүрүүчүлөрдөн да кабыл ала алат.

«Салих Аква» өндүрүштүн толук циклин камтыйт. Кластер жылына 5 миң тоннага чейин балык жемин өндүрөт, балыктын икрасын инкубациялайт, чабактарды өстүрөт, форель жана осетр балыктарын багат, кара икра өндүрөт жана балыкты кайра иштетет.

2022-жылдан бери кластерди өнүктүрүүгө 10 млн долларга жакын инвестиция салынган. Анын ичинен 6 млн 355 миң долларды Россия-Кыргыз өнүктүрүү фонду каржылаган.

Айыл чарба министрлигинин басма сөз кызматы белгилегендей, заводдун ишке кириши ата мекендик балыкты кайра иштетүүнүн көлөмүн көбөйтүүгө, кошумча наркы жогору продукция чыгарууга жана экспортту кеңейтүүгө мүмкүндүк берет. Ошондой эле долбоор жергиликтүү балык өстүрүүчү чарбалар менен кызматташууну өнүктүрүүгө, импортко көз карандылыкты азайтууга жана жаңы жумуш орундарын түзүүгө багытталган.