Жазгы талаа иштерине даярдануу учурунда Кыргызстандын өкмөтү айыл чарба техникаларын сатып алуу боюнча лизингдик программаны ишке ашырууга 540,1 миллион сом каражат бөлүү жөнүндө чечим кабыл алды. Бул тууралуу премьер-министр Улукбек Марипов жазгы талаа иштерине даярдык көрүү боюнча селектордук жыйында билдирди.

Өкмөт башчысы 2021-жылдын 15-февралынан тартып “Дыйканчылыкты каржылоо – 9” долбоорунун алкагында дыйкандарга жана дыйкан чарбаларына жеңилдетилген насыяларды берүү башталаарын эске салды.

“Ошондой эле, алар үчүн сертификатталган үрөндөрдү үрөн чарбаларынан базар баасынан 30% арзан баада сатып алуу механизми жөнөкөйлөтүлдү”, – деп кошумчалады Марипов.