Эмгек, социалдык камсыздоо жана миграция министрлиги 2026-жылдын 1-майына карата Кыргызстанда 8 миң 248 бош жумуш орду бар экенин билдирди. Суроо-талаптын көбү жумушчу адистиктерге багытталган.

Министрликтин маалыматында, учурда республикада расмий жумушсуздуктун деңгээли 1,4%ды түзөт. Иш менен камсыз кылуу кызматтарында 60,2 миң адам каттоодо турса, алардын 38,7 миңи расмий жумушсуз макамына ээ. Жыл башынан бери аталган кызматтарга 54 миң 807 жаран кайрылып, алардын 4554ү жумушка орноштурулган.

Мекеме эң көп талап кылынган кесиптер төмөнкүлөр экенин билдирди:

• тигүүчү;
• электр-газ ширетүүчү;
• сантехник-слесарь;
• ашпозчу;
• компьютердик оператор;
• бухгалтер (1С программасы менен);
• тейлөө тармагындагы адистер (косметолог, чач тарач, массажист ж.б.).