Эми 5 жылдан ашык эмгек стажысы жок жарандар пенсияга чыга албайт. Минималдык эмгек стажыны киргизели деп жатабыз. Мындай пикирин Социалдык фондун төрагасынын орун басары Гүлнура Жуматаева Жогорку Кеңеште пенсиялык тутумдагы реформалары боюнча айтып берип жатып билдирди.

“Минималдык эмгек стажыны киргизели деп жатабыз. Эмнеге? Азыркы учурда бир жылдык эмгек стажың болсо деле пенсияга чыга бересиң. Мындан улам эмне себептен пенсиям аз деген даттануулар жаралууда. Ошол себептен 5 жылдан 20 жылга чейин киргизели деп жатабыз. Бир жылдан, бир жылдан стажыны карап отуруп  өзгөртүүлөргө барабыз. Минималдык стажы боюнча бардык мамлекеттерде бар. Бизде жок”-деди.

Ушул тапта пенсиялык системаны реформалоо боюнча парламенттик угуу болуп жатат.