2026-жылдын январь-май айларында Кыргызстандын ички дүң продукциясы (ИДП) 781 млрд сомду түзүп, 12,2% реалдуу өсүү темпин көрсөттү. Бул тууралуу Министрлер кабинетинин төрагасы Адылбек Касымалиев аппараттык жыйында өлкөнүн беш айлык социалдык-экономикалык өнүгүүсүнүн жыйынтыктарын тааныштырып жатып билдирди.

Өкмөт башчынын айтымында, экономикалык өсүш негизинен төмөнкү тармактарда болгон:

• Курулуш тармагы — 64,6%;
• Өнөр жай — 14,4%;
• Тейлөө чөйрөсү — 7%;
• Айыл чарбасы — 3,7%.

Өнөр жай секторунда химиялык продукция (3 эсе), фармацевтика (1,8 эсе) жана транспорт каражаттарын (1,6 эсе) өндүрүүдө жогорку темптер байкалган. Ал эми негизги капиталга инвестициялардын көлөмү 157 млрд сомго жетип, 63,5 %га өскөн.

Чет өлкөлүк түз инвестициялар

Ошондой эле Адылбек Касымалиев тике чет элдик инвестициялардын агымы боюнча маалыматтар менен тааныштырды. Ал билдиргендей, 2024-жылы тике чет элдик инвестициялардын агымы 1 миллиард доллардан ашса, 2025-жылдын акырына карата бул көрсөткүч 1,31 миллиард долларга жетиши күтүлүүдө.

Инвесторлор үчүн эң жагымдуу секторлордун бири маалымат жана байланыш тармагы болгон. Бул тармакка инвестициялык агым 9,7 эсеге өскөн. Мындан тышкары саламаттыкты сактоо жана социалдык тейлөө (3,3 эсе), транспорт жана жүктөрдү сактоо (3,1 эсе), тоо-кен казып алуу (2,2 эсе) жана кайра иштетүү өнөр жайы (1,8 эсе) тармактарына инвестициялардын агымы өскөн.

Жалал-Абад облусу инвестиция тартуу боюнча лидер болуп, 420 млн доллар (жалпы агымдын 32%) алган. Экинчи орунда Бишкек шаары (401,3 млн доллар), үчүнчүдө Чүй облусу (228,4 млн доллар) турат. Ошондой эле Нарын (9,6 эсе) жана Ысык-Көл (4,2 эсе) облустарында жогорку өсүш байкалган. Ошол эле учурда Талас, Ош шаары, Бишкек жана Баткенде инвестициянын көлөмү бир аз төмөндөгөн.