«Массалык башаламандыктарды уюштурууга даярдык көрүүгө» шектелип камакка алынган активист Перизат Суранованын абалы салыштырмалуу канааттандырарлык. Бул тууралуу Reporter.kg’ге Жазаларды аткаруу кызматынан билдиришти.
Маалым болгондой, Суранова 14-декабрда ачкачылык жарыялаган.
«Перизат Суранова 14-декабрдан тарта ачкачылык жарыялаган. Ачкачылыктын себеби — ага козголгон иш. Мекеменин (№1 тергөө абагынын – ред.) медициналык кызматкерлерине арыз-даттануулары жок. Медициналык бөлүмдүн кызматкерлери күн сайын анын ден соолугунун абалына байкоо жүргүзүп, текшерүүдө.
17-18-декабрда тез жардам кызматы чакырылган. Тиешелүү түрдө текшерүү жүргүзүлгөн. Текшерүүнүн корутундусу боюнча ооруканага жаткырууга көрсөтмөлөр болгон эмес.
Бүгүнкү күнү Перизат Суранованын жалпы абалы салыштырмалуу канааттандырарлык. №21 мекемененин (№1 тергөө абагы – ред.) медициналык кызматкерлеринин көзөмөлүндө. Ошондой эле, ага кармап жаткан ачкачылыктын зыяны жана тобокелдиктери тууралуу түшүндүрүү иштери жүргүзүлгөн», — деп айтылат маалыматта.
Эскерте кетсек, буга чейин укук коргоочу Азиза Абдирасулова жана активисттер Перизат Суранова тамак-аш жана суу ичпей ачкачылык кармап жаткандыктан, ден соолугу кескин начарлап, өз алдынча баса албай жатканын билдиришкен. Ошондой эле, ден соолугу кескин начарлагандыгына байланыштуу ооруканага которуу керектигин айтышкан.
22-октябрда Кемпир-Абад суу сактагычын коргоо комитети түзүлгөн. Анын курамына активисттер, саясатчылар жана депутаттар кирген. 23-октябрда массалык тинтүү иштери башталып, 20дан ашык адам кармалып, алар 48 саатка камалган.
24-октябрда Бишкек шаарында Кемпир-Абад суу сактагычынын астындагы жердин Өзбекстанга берилишине жана активист, саясатчылардын камалышына каршы жөө жүрүш өткөн. 25-октябрда Биринчи май райондук соту тарабынан алар эки айга камакка алынып, кийинчерээк 20-февралга чейин камакта калтырылган.
Активист жана саясатчылардын камалышы боюнча ИИМ түшүндүрмө берип, Кылмыш-жаза кодексинин 36-278-беренеси «Массалык баш аламандыктарды уюштурууга даярдануу» менен козголгон кылмыш иши боюнча тергөө амалдары жүргүзүлүп жатканын билдирген.
Биздин Телеграм каналга катталыңыз
