21-майда «Салам Ош – 2026» аттуу VII эл аралык туристтик фестиваль өтөт. Бул тууралуу президенттин Ош облусундагы өкүлчүлүгү кабарлады.

Иш-чара Кара-Суу районунун Беш-Мерген жайлоосунда өтөт. Ага миңден ашык жергиликтүү жана чет элдик коноктордун катышуусу күтүлүүдө.

Фестивалда катышуучуларга кооз жаратылыш койнунда кыргыздын жайлоо маданияты, боз үй турмушу көрсөтүлөт. Ошондой эле концерттик программа жана улуттук этнооюндар уюштурулат.

Бул ири иш-чара Ош облусунун туристтик мүмкүнчүлүктөрүн, анын табигый жана тарыхый кооздуктарын дүйнөгө кеңири таанытууга, ошондой эле аймакта туризм тармагын өнүктүрүүгө багытталган.

Уюштуруучулар ар бир жаранды жана туристтерди бул өзгөчө майрамга катышууга чакырды.