Министрлер кабинетинин төрагасы Адылбек Касымалиев Кыргызстандын күйүүчү-майлоочу майлар (КММ) менен камсыздалышы боюнча кеңешме өткөрдү. Бул тууралуу министрлер кабинетинин басма сөз кызматы билдирди.

Кеңешмеде ички рыноктогу мунай продуктуларынын абалы, аларды импорттоо, зарыл болгон запастарды түзүү, тарифтерди жөнгө салуу жана мамлекеттик субсидияларды берүү маселелери талкууланды. Тиешелүү мамлекеттик органдардын жана уюмдардын жетекчилери жүргүзүлүп жаткан иштер тууралуу маалымат беришти.

Кеңешменин жыйынтыгында Адылбек Касымалиев кеңешменин катышуучуларына өлкөнү мунай продуктулары менен үзгүлтүксүз камсыздоону, рыноктогу абалга мониторингди күчөтүүнү, ата мекендик мунай иштетүүчү заводдорду модернизациялоо иштерин активдештирүүнү жана бардык зарыл чараларды өз убагында көрүүнү тапшырды.

Ошол эле учурда министрлер кабинетинин басма сөз кызматы бул тапшырмалар так кайсы мамлекеттик органдарга же уюмдарга берилгенин тактаган жок.