Казакстандын Актөбө облусунда Кыргызстандын жарандары катышкан автокырсыгы болуп, бир жаран каза тапты. Бул тууралуу КРдин Тышкы иштер министрлиги билдирди.

Маалыматка ылайык, окуя бүгүн, 21-августта, болгон. Кырсыктын кесепетинен үч адам каза таап, алардын бири М.Ж.А. аттуу кыргызстандык жаран экендиги аныкталган. Мындан тышкары, беш жүргүнчү ар кандай жаракаттар менен Айтеке бий райондук ооруканасына жеткирилген.

ТИМ бул факт боюнча Казакстандын компетенттүү органдары тарабынан сотко чейинки тергөө иштери башталганын билдирди.

Ошондой эле Кыргызстандын Казакстандагы элчилиги кырдаалды көзөмөлгө алып, казак тараптын органдары жана жарандардын жакындары менен байланышта болуп жатканы айтылды.