Айыл чарба министринин орун басары Рысгул Акимжанова Ош облусунун Өзгөн районундагы өндүрүштүк ишканалардын иши менен таанышты. Жумушчу сапардын жүрүшүндө «Кыргыз балык чарбасынын» жергиликтүү филиалы, райондук ветеринардык лаборатория, сүт кайра иштетүүчү цех жана «Эко Өзгөн күрүчү» ишканасы текшерилди.

Күрүч заводундагы калдыксыз технологияга өзгөчө көңүл бурулду: Өзгөн күрүчүн тазалоодон кийин калган кабыктар ыргытылбастан, андан курулуш материалдары жана кыш чыгарылууда. Жолугушууда таңгактоо стандарттары, сактоо тутумдары жана айыл чарба продукциясына карата катуу лабораториялык көзөмөл маселелери да талкууланды.

Айыл чарба министрлиги райондо чийки затты даярдоодон баштап, даяр бренддик товарларды чыгарууга чейинки бирдиктүү өндүрүштүк циклди түзүү пландалып жатканын билдирди. Мындай ыкма кошумча наркты жогорулатып, жаңы жумуш орундарын түзүүгө жана Өзгөн продукциясынын рыноктордогу атаандаштыкка жөндөмдүүлүгүн арттырууга шарт түзөт.