Пакистан Кыргызстанга өзүнүн портторуна, анын ичинде Карачи жана Гвадар портторуна транспорттук жолдорду ачуу үчүн мүмкүнчүлүктөрдү сунуштап жатат. Ошондой эле жакынкы жылдары өлкө Кыргызстан менен товар жүгүртүүнү 200 млн долларга чейин көбөйтүүнү максат кылууда. Бул тууралуу бүгүн, 2-сентябрда, Пакистандын премьер-министри Мухаммад Шахбаз Шариф Кыргызстандын президенти Садыр Жапаров менен жолугушуусунда билдирди.

Жолугушууда жетекчилер эки өлкө ортосундагы саясий диалог, соода-экономикалык байланыштар, транспорт жана энергетика тармактарындагы биргелешкен долбоорлорду талкуулашты. Ошондой эле виртуалдык активдер жаатындагы кызматташтыкты жана маданий-гуманитардык байланыштарды карап чыгышты.

Садыр Жапаров өз сөзүндө эки өлкөнүн ортосунда саясий мүнөздөгү чечилбеген маселелер жок экенин айтып, акыркы жылдары жогорку деңгээлдеги саясий диалог өзгөчө активдүү жана ырааттуу мүнөзгө ээ болгонун баса белгиледи.

Ал эми Шахбаз Шариф өз кезегинде Кыргызстандын жетекчилигин жана элин өлкөнүн эгемендүүлүгүнүн 35 жылдыгы, ШКУ саммитинин өткөрүлүшү жана VI Дүйнөлүк көчмөндөр оюндарынын ачылышы менен куттуктады. Ошондой эле пакистан тарап эки өлкө ортосунда кол коюлган келишимдерди жүзөгө ашыруу үчүн иш алып барууга даярдыгын билдирди.