Жусуп Баласагын атындагы Кыргыз улуттук университетинин (КУУ) факультеттер аралык дене тарбия жана спорт кафедрасынын ага окутуучусу Бакыт Кадыров комбат-джиу-джитсу боюнча бешинчи ирет Азия чемпиону болду.

Ал 10–13-сентябрь күндөрү Түштүк Кореянын борбору Сеул шаарында өткөн Азия чемпионатында 85 килограммга чейинки салмак ченинде биринчи орунду багындырды.

Күн мурун КУУнун ректору Догдурбек Чонтоев Кадыровду жеңиши менен куттуктап, ага ноутбук тапшырды, ал эми профсоюз комитетинин төрагасы Кубанычбек Жумабеков спортчуга университеттин пансионатына жолдомо белек кылды.

Жолугушууга ошондой эле биринчи проректор — окуу иштери боюнча проректор Алайбек Шамшиев, эл аралык кызматташтык жана байланыштар департаментинин директору Бакыт Келдибеков жана факультеттер аралык дене тарбия жана спорт кафедрасынын башчысы Шаршен Абдыкеримов катышты.

Бул Кадыровдун Азия чемпионаттарындагы бешинчи жеңиши. Буга чейин ал 2022, 2023, 2024 жана 2025-жылдары чемпион аталган.

Мындан тышкары, спортчу 2025-жылы Дүйнө кубогун жеңип алган, ошондой эле Европанын чемпиону жана ММА боюнча HFC32 жана Grappling WJF версияларындагы эл аралык турнирлердин чемпиондук алтын курларынын ээси болуп саналат.