Кыргызстандын Экономика жана коммерция министрлиги менен Кореянын Соода, өнөр жай жана ресурстар министрлигинин ортосунда соода жана инвестициялар жаатында кызматташуу боюнча меморандумга кол коюлду. Бул тууралуу КРдин Экономика министрлиги билдирди.

Документке КРдин экономика министри Бакыт Сыдыков менен Кореянын соода, өнөр жай жана ресурстар министри Ким Чон Квандын жолугушуусунда кол коюлган.

Маалыматка ылайык, меморандумду ишке ашыруу боюнча эки министрдин орун басарлары жетектеген Соода жана инвестициялар боюнча кызматташтык комитети иштейт. Документ төмөнкү багыттарда өз ара аракеттенүүнү карайт:

• экономикалык жана өнөр жай кызматташтыгы;
• соода жол-жоболорун жөнөкөйлөтүү жана инвестицияларды илгерилетүү;
• халал-индустрия жана критикалык минералдар;
• санариптик трансформация;
• химиялык өнөр жай жана текстиль өндүрүшү;
• бизнес-чөйрөнү өнүктүрүү, техникалык жөнгө салуу жана интеллектуалдык менчик.