Бүгүн, 6-июнда жана 9-июнда Бишкектеги Д. Өмүрзаков атындагы стадиондо Кыргызстандын жана Палестинанын улуттук курама командаларынын ортосунда эки эл аралык жолдоштук беттеш өтөт. Оюндар ФИФАнын июнь айындагы күндөрүнүн алкагында уюштурулат. Бул тууралуу Министрлер кабинети кабарлады.

Беттештердин алдында Министрлер кабинетинин төрагасы жана Кыргыз футбол биримдигинин президенти Адылбек Касымалиев улуттук кураманын оюнчулары жана машыктыруучулар штабы менен жолугушкан. Ал спортчуларга ийгилик каалап, команданын кесипкөйлүгүнө жана эл аралык аренада өлкө намысын татыктуу коргой тургандыгына ишеним билдирген.

Эске салсак, өкмөт башчы Адылбек Касымалиев ушул жылдын 12-майында Кыргыз футбол биримдигинин (КФБ) президенти болуп шайланган.