Кыргызстанда «Мать-героиня» же «Баатыр эне» ордендери менен сыйланган энелердин пенсиясына ай сайын берилүүчү кошумча төлөмдү 1 миң сомдон 5 миң сомго чейин жогорулатуу сунушталууда. Тиешелүү мыйзам долбоорун Жогорку Кеңештин депутаттары Камила Талиева, Марлен Маматалиев жана Алтынбек Кудайбердиев иштеп чыгышты.

Долбоорго ылайык, өзгөртүүлөрдү «Мамлекеттик пенсиялык социалдык камсыздандыруу жөнүндө» мыйзамдын 13-беренесине киргизүү сунушталууда. Кошумча төлөмдүн өлчөмүн эсептик көрсөткүчтүн 1 миңинен 5 миңине чейин көбөйтүү пландалууда, бул ай сайын берилүүчү төлөмдү 1 миң сомдон 5 миң сомго чейин жогорулатууга дал келет. Үстөк акы сыйлык алган, анын ичинде багуучусунан ажырагандыгы боюнча пенсия алган энелерге да каралган.

Кошумча төлөмдүн учурдагы өлчөмү 2011-жылдан бери кайра карала электиги белгиленет.

Демилгечилердин айтымында, азык-түлүккө, коммуналдык кызматтарга жана дары-дармектерге баалардын өсүшүнөн улам 1 миң сом өлчөмүндөгү төлөм өзүнүн колдоо көрсөтүүчү маанисин жоготту.

Мыйзам долбоору көп балалуу энелерге мамлекеттик колдоону күчөтүүгө багытталган. Негиздеме-маалымкатта келтирилген маалыматтарга ылайык, Кыргызстанда «Баатыр эне» орденине татыктуу болгон 34 миңге жакын аял жашайт.

Мыйзам долбоорунун авторлорунун эсеби боюнча, баатыр энелердин пенсиялык кошумча төлөмдөрүн көбөйтүү үчүн республикалык бюджеттен 1 миллиард 662 миллион сом талап кылынат.

Мыйзам кабыл алынган учурда, аны 2027-жылдын 1-январынан тартып күчүнө киргизүү сунушталууда.

Анара Мамытова