Кыргызстандын президенти Садыр Жапаров браконьерлик үчүн жоопкерчиликти күчөткөн Кылмыш-жаза кодексине киргизилген өзгөртүүлөргө кол койду.

Түзөтүүлөргө ылайык, эми мыйзамсыз аңчылык кылуу, балык жана башка суу жаныбарларын кармоо үчүн 50 миң сомдон 100 миң сомго чейин айып пул каралган. Буга чейин айып пулдун өлчөмү 20 миңден 50 миң сомго чейин болчу. Ошол эле учурда, эки жылга чейинки мөөнөткө белгилүү бир кызматтарды ээлөө же белгилүү бир ишмердүүлүк менен алектенүү укугунан ажыратуу түрүндөгү кошумча жаза сакталып калат.

Мыйзамсыз аңчылык кылуу же механикалык транспорт каражаттарын, атайын каражаттарды, жарылуучу же химиялык заттарды, электр тогун, синтетикалык балык уулоочу торлорду же канаттууларды, айбанаттарды, балыктарды массалык түрдө жок кылуунун башка ыкмаларын колдонуу менен балык уулоо, эгерде мындай аракеттер ири өлчөмдө зыян келтирсе, кыйла катуу жаза каралган.

Бул учурда тартип бузгандарга 100 миңден 200 миң сомго чейин айып пул салынат же эки жылдан беш жылга чейинки мөөнөткө эркинен ажыратылат. Ошондой эле үч жылга чейинки мөөнөткө белгилүү бир кызматтарды ээлөө же белгилүү бир ишмердүүлүк менен алектенүү укугунан ажыратуу каралган.

Өзгөртүүлөр киргизилгенге чейин мындай аракеттер үчүн 50 миңден 100 миң сомго чейин айып пул же эки жылга чейинки мөөнөткө эркинен ажыратуу каралган болчу.